Суук демекчи, синоптиктер бүгүн аба ырайы Бишкекте +3…+5, Ошто +10 градуска чукулдарын айтышты.
Баса, бүгүн борбор калаанын бир катар көчөлөрүндө кечки саат бешке чейин "Ильич шамы" өчүрүлөт.
Үстүңдө үйүң болсо, суук шаштыңды алып, жарыктын өчүп айлаңды кетиргени түккө турбаган нерсе болуп калат. Мамлекеттик ипотека компаниясынын төрагасы Бактыбек Шамкеев ипотекага бериле турган үйлөрдүн шарт-жагдайын түшүндүрдү.
Ишенесизби, Кыргызстандын бир бурчунда үй-бүлөлөр эч качан бүлүнбөгөн, ажырашпаган аймак бар. Ал чакан, бирок өзгөчө.
Бүлүнбөгөн үй-бүлө демекчи, Нарында жайгашкан баягы-ыы памирлик кыргыздар бар го. Алардын ичинен балалуу болгон жаш үй-бүлөнүн чүрпөсү Нарынбекке туулгандыгы тууралуу күбөлүк тапшырылды. Бешиктеги баланын бек болорун ким билет, элдин керегине жараган уул болсун деп тилек кылып коелучу.
Ушул биз болсок эле "Бурадарда" кантип саясат аралашкан маалыматты бербей коелу. Кечээ президент англисче шакылдап сүйлөгөн элчи Чыңгыз Айдарбековду Тышкы иштер министрлигине башчы кылып бекитти.
Эми ааламда эмне болуп жатканынан кабарласак, эбак сөөгү сөпөт болгон Гитлер тууралуу маалымат көптөрдүн жумшактай атканда "оозун ачырды". Фашизмдин символу болгон бул адам… эркек да, аял да экен дешти.
Кадимки эле аялды эркек, болгондо да террорчу эркек деп дүйнөгө жар салган учурду уктуңуз беле? Укпасаңыз, бул жерден окуңуз. Казак апа кызыктай эле абалда калса керек.
Айдоочуларда деле ыйман бар экен… Sputnik Кыргызстан социалдык эксперимент жасаган эле.
Валюта наркы. Сомдун баасы долларга карата орто эсеп менен 69.24 (сатып алуу) жана 69.52 (сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгү бензин 46.50 сом, АИ-92 үлгүсүндөгү май 44.00 сом, ал эми дизель майы 46.50 сомдон сатылууда.
Соңку сөз. Уккандан уга элегиң көп!
Аманчылык тилеп, Нургүл Максутова.
