БИШКЕК, 6-сен. — Sputnik. Көчмөндөрдүн дүйнөлүк III оюндарынын ачылыш аземине кыргыз спортчулары улуттук кийим кийип чыгышкан жок.
Мунун себебин Жаштар иши, дене тарбия жана спорт мамлекеттик агенттиги өтпөй калган тендерге байланыштырды.
Эске салсак, буга чейин аталган ведомство Көчмөндөрдүн дүйнөлүк III оюндарынын салтанаттуу бөлүгүнө кийип чыкчу форманын дизайнына сынак жарыялаган.
"Шарт боюнча комплектиге баш жана сырт кийим, эркектер үчүн шым, аялдар үчүн көйнөк болушу керек. Мунун баары улуттук колоритте тигилип, Көчмөндөр оюндарынын эн белгиси тагылышы зарыл", — дешкен агенттиктен.
"Спортчуларыбыз быйыл улуттук форма кийген жок. Анткени тендер болбой калып, биз да сынак өткөрбөй эле коюуну чечкенбиз. Ошондуктан спортчулар жөнөкөй эле спорттук кийим менен чыгышты. Параддык костюмдарды быйыл маданий кызматкерлер эле кийишти", — деди агенттиктин маалымат катчысы Нурпери Садырбекова.
Эске салсак, Көчмөндөрдүн дүйнөлүк II оюндарында спортчулар улуттук форма кийишкен. Расмий ачылышта эркектер чапан, калпак кийсе, аялдар улуттук көйнөк, чапан жана буттарына булгарыдан жасалган өтүк менен чыгышкан.
