Аптаптуу күндөрдүн биринде "Ош" базарына барып, ал жактагы катардагы жарандардын күнүмдүк-турмушун билүүгө ашыктым.
Адаттагыдай эле "Ош" базардын кире бериши кишиге толуп, бут коёрго жер жок. Бул жолу базардын алды жайма-базар болуп кеткени көңүлдү бурду. Алардан эптеп өтүп дароо эле жер-жемиш жана гүл саткан бөлүмүнө бардым. Ии-ий, эми ал жердеги кургатылган жер-жемиштин жытын айт. Жөн эле аңкыйт. Бир сыйра шилекейим да чууруп кетти.
"Ош" базардагы гүл базарды бардыгы эле биле бербесе керек. Себеби, "базардан барып аламбы? Тааныштар көрсө эмне дейт?" деген куру намыс айрымдарыбызды буттан тушап турат эмеспи. Орустар айтмакчы "А, зря". Сыр катары айтып коёюн дал ушул гүл базардан Бишкектеги гүл саткан ири дүкөндөр таңгагы менен алып кетет. Бул жерде гүл арзан, ал эми борбордогу дүкөнгө түшкөндө наркы эки эсе көбөйөт. Башкача айтканда 50 сомдук розалар 120-130 сомго чейин чыгат.
Гүл саткандардын айтымында, азыр розаларды гана тыштан алып келип жатышат. Калган гүлдүн баары Бишкектин чет жакасындагы атайын жайларда өстүрүлөт. Көз жоосун алган гүлдөрдү видеого тартканыма сүйүнүп эле сүрөткө тартканды унутуп калыптырмын.
Кыскасы жылуу-жумшак кеңседе отура берип обочолоно бербей, базар аралап, элге аралашып, чыныгы жашоо кандай болуп жатканынан кабар алып туралы. Силерди билбейм, бирок мен жок дегенде бир айда 2-3 жолу базарга, вокзалга кыскасы карапайым калк көп жүргөн жерлерге барып турууну чечтим. Кызыктуу сүрөт, видеолорду көрөм десеңер Facebook баракчам менен YouTube каналымды акмалап тургула.
Биздин сайтка чыккан кызыктуу материалдарга да бир көз салып коюңуз.
Чет элдик туристтер Ысык-Көлгө агылып жаткан учурда Балыкчыдан Караколго бараткан жолдун асфальтын суу жеп кетти. Жергиликтүү бийлик кечээ түн жарымга чейин эле оңдоп коёбуз деп убада беришкен.
Ысык-Көлдүн жээгинде 2-8-сентябрда боло турчу Дүйнөлүк көчмөндөр оюндарына канча каскадер катышат деп жатсаңыз бул кабарды ача салыңыз.
Өкүл ата өз ата демекчи жаш жубайларга шайлана турган өкүл ата тууралуу эмне билесиз? Эгер өкүл ата шайлай турган болсоңуз, же башка бирөөлөр бизге "өкүл ата болуңуз" деп жатса бул материал сиз үчүн. Өкүл атага байланышкан "болбойттун" баарын тизмектеп койдук.
Валюта наркы. Сомдун баасы долларга карата орто эсеп менен 68.11 (сатып алуу) жана 68.33 (сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгү бензин 47.00 сом, АИ-92 үлгүсүндөгү май 44.30 сом, ал эми дизель майы 45.00 сомдон сатылууда.
Соңку сөз. Гүлдөй жайнап, айланага сонун маанай тартуулап гана жүрө бергиле деп Расул Үсөналиев.
