Ошентип тирүүлүктүн дагы бир күнү башталып, баарыбыз күнүмдүк иштерге шымалана кириштик. Ал ортодо кечээ өлкөдө жана дүйнө жүзүндө кандай окуялар болгонуна көз чаптырып алалы.
Сыйлуу коноктор. Көчмөндөрдүн дүйнөлүк III оюндарына аз калды. Мындай олуттуу иш-чарага чет элдик аттуу-баштуу коноктор чакырылып жатат. Алардын арасында Голливуд жылдыздары Анжелина Жоли, Леонардо Ди Каприо, Жеки Чан жана индиялык актриса Диа Мирза дагы бар.
Жаңы жол. Көчмөндөр оюндары демекчи, "Кырчын" жайлоосуна бара жаткан жолдо 2016-жылы кандай тыгын болгону эсиңиздеби? Быйыл андай кырдаал жаралбашы үчүн "Кырчынга" алып барчу альтернативдүү жол курулуп жатат. Эми коноктор аталган жайлоого Семеновка капчыгайы менен кирип, Григорьев капчыгайы тараптан чыгып кетишет.
Криштиану Роналду. Атактуу футболчу жаңы барган "Ювентус" (Италия) клубунун оюнчусу катары расмий түрдө тааныштырылды. Команданын алдына биринчи ирет чыккан футболчу өзүнүн алдыга койгон пландарын бөлүштү.
Алты жашар Мишаны издөө. Бул учурда Кыргызстанда жаш балдарга тиешелүү бир катар жагымсыз окуялар болуп кетти. Кечээ кечке ӨКМ куткаруучулары (булар баланы мурда дагы издеп жатышкан — ред.) менен ыктыярчылар Чоң Чүй каналына түшүп кетти делген алты жашар баланы издешти. Тилекке каршы, жыйынтык болгон жок.
Ыктыярчы. Бир нече күндөн бери баласын таппай карайлап жаткан ата-энеге жардам берүүнү каалаган ыктыярчылардын арасында Рысбек Орозалиев болду. Жаштарга үлгү болчу жакшы иш жасаган жигит Sputnik агенттигинин редакциясына баш багып, эмне себептен баланы издейм деп чечкенин айтып берди.
Фоторобот. Эсиңерде болсо 10-июль күнү Сокулук айылында чаламандын чак түшүндө 10 жашар кызды белгисиз эркек кордоп койгон. Кечээ Чүй милициясы шектелүүчүнүн фотороботун түзүп чыкты. Көргөн-билгендер болсо укук коргоо органдарына кабарлап коюңуздар.
Суу өчөт. Баса, бүгүн Бишкектин айрым аймактарда таза суу берүү убактылуу токтотулат. "Бишкексууканал" ишканасы суунун өчүшүн түтүктөрдөгү курулуш-монтаж иштерине байланыштуу деп түшүндүрдү.
Валюта наркы. Сомдун баасы долларга карата орто эсеп менен 68.10 (сатып алуу) жана 68.18(сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгү бензин 47.00 сом, АИ-92 үлгүсүндөгү май 44.30 сом, ал эми дизель майы 45.00 сомдон сатылууда.
Соңку сөз. Өлкөбүздө тынчтык болуп, балдарыбыздын жүзүнөн күлкү кептесин!
Аманчылык тилеп, Бегимай Бакашева.
