Коррупция менен күрөшүүдө кийинкилердин жолун бууй турган система керек. Ошондо гана анын жыйынтыгы билинет. Мындай пикирин Искендер Ормон уулу Sputnik Кыргызстан радиосуна маек куруп жатып билдирди.
Анын айтымында, коррупциялык иштерди жасап жаткандарга чара көрүү менен биргеликте эле, келечекте алардын кайталанбашына шарт түзүү керек. Бул үчүн бийликке жаңы көз караштагы аткаминерлер келиши зарыл.
"Корея, Сингапурду бизден бир топ жыл мурда өнүккөн десек, Африканын Руандасын мисалга алсак болот. 2000-жылдары эле экономикалык абалы кандай эле? Ал эми азыр коррупцияны жок кылып, дүркүрөп өнүгүп жаткан мамлекеттер катарына кирди. Грузия, Украина мамлекеттери, ал эле эмес ЕАЭБге мүчө Арменияны карайлы. Ууру ким болсо – анын орду түрмөдө деген саясат менен иштеп жатышат. Мына ушул өлкөлөр сыяктуу биз да коррупция менен күрөшүүдө, кийин кайра коррупционерлер пайда болбой турган система иштеп чыгышыбыз керек ", — деди Ормон уулу.
Ал жемкорлук жоюлганда гана өлкөнүн экономикасы эле эмес, маданият, билим берүү жана башка тармактары өнүгөөрүн кошумчалады.
