БИШКЕК, 10-июл. — Sputnik. Ак-Суу районунун Таш-Кыя айылынын тургуну Кызыл китепке кирген жырткыч канаттуу менен колго түштү. Бул тууралуу Бул тууралуу NABU айлана-чөйрөнү коргоо уюмунун маалымат катчысы Зарина Эсенбаева билдирди.
Анын айтымында, Ысык-Көл облусунда браконерликке каршы рейд өттү.
"Аңчылык департаментинин Каракол шаарындагы кызматкерлери Кызыл китепке кирген кара ылаачын кушун колго баккан жаранды кармады. Колго түшкөн адам кушту достору белекке бергендигин айтып жана аны менен салбурун фестивалына катышууга ниеттенип жаткандыгын айткан. Андан сырткары, түлкү жана кашкулактын чыргалары табылды. Аларды кушту таптоодо колдонуп келген", — деди Эсенбаева.
Адис жапайы канаттууну үй шартында кармаган жаранга карата административтик протокол түзүлүп, 250 миң айып салынышы мүмкүн экендигин кошумчалады.
Кара ылаачын — алгыр куштардын түрүнө кирип, тез учкан канаттуулардын катарын толуктайт. Ал саатына 322 чакырымды басып өтөт же секундасына 90 метр ылдамдыкка чейин уча алат.
