БИШКЕК, 3-июл. — Sputnik. Бишкектиктер эшиги кулпуланган унаанын ичиндеги ыйлап жаткан ымыркайды алып чыгышты. Бул тууралуу Sputnik агенттигине "куткаруу операциясына" катышкандардын бири айтып берди.
Ош базарынын жанында алты айлык ымыркайды ата-энеси унаанын ичине таштап кеткен.
"Жолдо кетип баратсам унаанын жанында турган киши машинанын ичиндеги ымыркай 40 мүнөттөн бери ыйлап жатканын билдирди. Биз ага унаанын эшигин ачууга жардам бердик. Ал эми ымыркай токтобой ыйлап жатты. Сатуучу аял аны колуна ала калып жоошутту. 40 мүнөт өткөн соң ымыркайдын ата-энеси келип, ыраазычылык билдиргендин ордуна унаанын эшигин ачканыбыз үчүн ачууланышты. Акыры кечирим сурашты. Көрсө алар базарга азык-түлүк алганы кетип калышкан экен", — деди күбө.
Окуянын күбөлөрү милицияга же социалдык органдарга кайрылган эмес.
ШИИБ маалыматты текшерип жатты.
