Негизи эле кыргыз эли этке өзгөчө маани беребиз. Конокко барганда башка нерсени бербей койсо мейли, эт тартпай көрсүнчү, аз жерден туугандык мамиле үзүлүп кала жаздайт. Устукан тартып жатканда дагы кылдат болуу керек, кокусунан эле чоң жиликти кичүүлөргө тартып ийсең, андан жогору жакта отургандар менен жүз карашпай калышың ыктымал. Эт жана устукан тартуу боюнча айта берсек бурадарга батпайт, бир илимий материал чыгышы мүмкүн. Мен сиздерге кантип эт бышырганымды айтып берейин дедим. Мурда анча маани бербептирмин. Мурдагы күнү куда тосуп койдун этин бышырып анын башын куйкалап, тазалгандан кийин көк пакетке (тойлордо берилчү) ороп казанга салып койгом. Ал пакеттин кызматы баштын жагымсыз нерселерин, жыттарын шорпого чыгарбоо эле. Муну сүрөткө тартып, Facebook баракчама жүктөп койгом, ошол бойдон телефонду караганга колум бошободу. Жумуш бүткөндө Facebook баракчамды ачсам жанагы сүрөттүн астына комментарийлер жайнап кетиптир. Жазгандардын арасында кыргызга төбөсү көрүнгөн адамдар да бар. "Кокуй баштыктын боёгу чыкты, химикаттын баарын чыгардың, бул деген уу да, кайран этти кордодуң" деп жазышыптыр. Баарынан да "Ойлорунда укмуш кыйратып жатабыз дешсе керек. Кыргыз качан ушинтип эт бышырчу эле. Кытайлар балакеттин баарын кылышат. Бул түрү менен кытай болушат жакында" дегенде жакамды кармап отуруп калдым. Ушундай, бурадар… Аз жерден кытай болуп кала жаздадым.
Эми кечээги жаңылыктарды тизмектейли.
Кыргыздын улуттук тамагы кымызга да бир нерсе кошуп алып элден тепки жебейин десеңиз, кымызга байланыштуу 6 болбойтту билип алыңыз.
Катын албай, кайын ал! Качандыр бир кезде жана ушул тапта эл башкарган саясатчылар бапестеп баккан кыздарын кимге ишенип бергенине кызыксаңыз бул жакка баш багыңыз. Кимдин күйөө баласы кайсы жакта иштейт?
Саясат демекчи, эл өкүлү Камчыбек Жолдошбаев кесиптештерин акча чогулталы деп үндөп, өзү Кытайга болгон карыздан кутулуу үчүн бир миллион сом берүүгө даяр экенин жар салбады беле. Мындан улам кесиптешим Бегимай Бакашева парламент депутаттары буга кандай көз карашта экенин билип көрдү.
Баса, кечээ президент Жогорку Кеңешке барып кайрылуу жасап "Жооп берчү күн келээрине эч кимдин күмөнү болбосун!" деп мамлекеттин укуругу узун экенин эскертти. Ага улай эле кайсы коррупционерди кармаба анын артынан депутаттын же кайсы бир саясий топтун "ушул адамды бошотуп койсоңуз" деген суранычтары түшүп жатканына токтолду.
Саясат саясаты менен, сыртта эмне болуп жатканын көз жаздымдан өткөрүүгө болбойт. Борбор калаада шаар көркүн бузуп, кейпи кетип кайдагы бир кароосуз калган калааны чагылдырган 15 имараттын сүрөтүн көрүп коюуңуз.
Футболго келсек, башынан эле аябай интрига менен оюн көрсөтүп келген Германиянын футболчулары үйүнө кайтмай болду.
Бейшембиге карата аба ырайы. Күн жылуу.
Валюта наркы. Сомдун баасы долларга карата орто эсеп менен 68.08 (сатып алуу) жана 68.32 (сатуу) сомду түздү.
Мунай баасы. Бишкекте орточо эсеп менен алганда АИ-92 үлгүсүндөгү май 44.30 сом, АИ-95 үлгүсүндөгү бензин 47.00 сом, ал эми дизель майы 45.00 сомдон сатылууда.
Соңку сөз. Эт да, шорпо да жакшы эле бышты, сарсанаа болбоңуздар!
Амандыгыңызды тилеп Эламан Карымшаков.
