БИШКЕК, 18-июн. — Sputnik. Бишкек шаарынын Биринчи Май райондук соту Дүйшөнбек Зилалиевдин ишин 3-июлда саат 10:00дө карамай болду. Судья катчы ооруп калгандыгын айтып ишти кийинкиге жылдырган.
Экс-вице-премьер Дүйшөнбек Зилалиевге террорчулук актысы тууралуу жалган маалымат берүү боюнча айып тагылып, үйдөн чыкпоого милдеттендирилген.
Эскерте кетсек, айрым ЖМКлар президенттин инаугурациясы болгон 24-ноябрь күнү күч түзүмдөрүнүн өкүлдөрүнө өкмөттүк трассага коюлган бомба тууралуу маалымат түшкөнүн жазып чыгышкан. Маалыматты ИИМ академиясында окуган кыз Зилалиевге таянуу менен билдирген.
Андан кийин аткаминердин өзүнүн билдирүүсү жарыяланып, анда Зилалиев "түшүнүксүз иштин фигуранты" болуп жатканын айткан. Экс-чиновник курсант кыз анын сөзүн туура эмес түшүнүп алганын билдирген.
