БИШКЕК, 16-июн. — Sputnik. Борбор калаадагы Аламүдүн-1 кичи районундагы батирлердин биринен адамдын сөөгү табылды. Бул тууралуу Бишкек ШИИБден маалымдашты.
"Маркумдун сөөгүн туугандары таап, 15-июнь күнү түнкү саат 03:30да милицияга кабарлашкан. Окуя болгон жерге Свердлов райондук ИИББдин кызматкерлери жөнөгөн", — деп милициядан билдиришти.
Тартип сакчылар шектүүнүн изи сууй электе колго түшүргөн. Алдын ала маалымат боюнча, маркум менен шектүүнүн ортосунда пикир келишпестик чыгып мушташа кетишкен. Натыйжада кылмышкер колуна катуу нерсе алып тигини койгулап калган.
Аталган факты боюнча Кылмыш жаза кодексинин 97-беренеси (адам өлтүрүү) боюнча кылмыш иши козголду. Кармалган киши Бишкек ШИИББинин тергөө абагына киргизилди.
