БИШКЕК, 6-июн. — Sputnik. Тамчы айылындагы "Ысык-Көл" эл аралык аэропорту 21-июндан тарта туристтик сезонду ачат. Бул тууралуу "Манас" эл аралык аэропортунун маалымат кызматы билдирди.
Алгачкылардан болуп Россиянын Новосибирск шаарынан учак келип конот. Россиянын S7 авиакомпаниясы жумасына эки жолу — шаршемби жана ишемби күндөрү каттап турат.
22-июнда Оштон учак келип конот. TezJet авиакомпаниясы жумасына үч жолу Ош — Ысык-Көл — Ош каттамы менен жүргүнчүлөрдү ташыйт.
22-июндан тартып "Узбекистон хаво йуллари" авиакомпаниясы Ташкенттен жүргүнчүлөрдү шейшемби жана жума күндөрү ташып келип турат.
29-июнда "Ысык-Көл" аэропорту Алматыдан учактарды кабыл ала баштайт. QAZAQ air авиакомпаниясы жумасына эки жолу — дүйшөмбү жана жума күндөрү каттамакчы.
