БИШКЕК, 6-июн. — Sputnik. Киши компьютердин чычканын кантип колдонгону паркинсон жана альцгеймер ооруларын аныктоого жардам берерин Дьюк университети Microsoft компаниясы менен биргелешкен изилдөөдө аныкталды. Бул тууралуу Daily Mail басылмасы жазды.
Изилдөө учурунда адистер Bing издөө системасы аркылуу 31 миллиондон ашык сурамды жасалма интеллектинин жардамы менен анализдешкен.
Окумуштуулар чычканды кылтылдатып кыймылдатуу, баракчаны акырын жылдыруу жана маалыматты интернеттен кайталап кароо жогорудагы оорулардын пайда болуп жатканынан кабар берерин билдиришти.
Изилдөөнүн авторлору алардын паркинсон жана альцгеймер ооруларын аныктоо методу дарыгерлерге барууну жана атайын жабдууларды талап кылбай турганын белгилешти. Окумуштуулар бул жыйынтыктар келечекте атайын программа иштеп чыгып, анын жардамы менен ооруну дарыгерлерден мурда аныктоого шарт түзөт деп ишенишүүдө.
