БИШКЕК, 7-май — Sputnik. Каракол шаарынан Mercedes-Benz Sprinter унаасын айдай качты делген адамдар Түп районунан Арал айылынан кармалышты. Бул тууралуу Ысык-Көл ОИИБинин маалымат кызматынан кабарлашты.
Билдирмеге караганда, шаар тургуну машинасын белгисиз адамдар уурдап кеткенин айтып, укук коргоо органдарына 6-май күнү кайрылган.
"Ыкчам-издөө тобу уурдалган унаанын изин суутпай, Түп районундагы Арал айылынан тапты. Шектүү катары кармалган Түп айылынын 24, 53 жаштагы эки тургуну, Ак-Суу районунун 26 жаштагы тургуну унаанын ичинде спирт ичимдиктерин ичип отурган", — деп айтылат билдирүүдө.
Аталган факты боюнча КРдин Кылмыш жана жаза кодексинин 172-беренеси (Унааны же башка автомототранспорт каражатын укукка жат түрдө ээлеп алуу) менен кылмыш иши колголуп, шектүүлөр убактылуу кармоо жайына киргизилди.
