БИШКЕК, 2-апр. — Sputnik. Израилдин премьер-министри Биньямин Нетаньяху Түркиянын президенти Режеп Тайип Эрдоган Түндүк Кипрди оккупациялоо менен жарандык калкты талкалаганын унутуп башкаларга акыл үйрөтүүгө акысы жок экенин эскертти. Бул тууралуу РИА Новости жазып чыкты.
Буга чейин эки лидер бири-бирине бир катар айыптоолорду койгон болчу. Тагыраагы, Эрдоган Израилдин аракеттерин "адамгерчиликсиз" деп атаган. Ал эми Нетаньяху "дүйнөдөгү эң адептүү армия жарандык коомду бомбалап жаткан адамдын лекциясына муктаж эмес" деп жооп кайтарган. Ал эми Эрдоган Нетаньяхунун "Түркия жарандык коомду талкалап жатат" деген сөзүн төгүндөп, Тель-Авив террорчулук саясатын жүргүзүп жатканын жар салган.
"Эрдоган татыктуу жооп алганга көнгөн эмес да. Эми көнүүгө туура келет. Түндүк Кипрди оккупациялоо менен күрддөрдүн аймагына кирип, Африндеги жарандык коомду талкалап жаткан адамдын бизге акыл үйрөтүүгө акысы жок", — деп Нетаньяхунун Facebook баракчасына жазылган.
Жума күнү Израилге каршы "Артка кайтуунун улуу маршы" аттуу жүрүш башталып, майдын ортосуна чейин улантуу пландалып жатат. Израилдин бийлиги акцияга чыккан миңдеген адамдын катуу агрессиясына каршы курал колдонууда.
1974-жылы грек аскерлеринин катышуусу менен Кипрде мамлекеттик төңкөрүш жасоо аракетине жооп катары Түркия аймакка аскердик жактан кийлигишип Кипрди экиге бөлгөн.
Кипрди кайра бириктирүү боюнча маселе 2014-жылы жанданган.
Түркиянын Куралдуу күчтөр башкы штабы 20-январда Сириядагы Африн шаарында күрддөрдүн түзүлүшүнө каршы "Олива бутагы" аттуу операцияны баштаган. Түркия менен бир учурда эле "Сирия эркин армиясы" согушкерлери иш жүргүзүүдө (ССА). Эрдоган 18-мартта Африн түрк армиясы менен ССАнын көзөмөлүнө өткөнүн жар салган. Дамаск Түркиянын Африндеги аракеттерин айыптап, бул аймак Сирияга караштуу экенин эскерткен.
