БИШКЕК, 1-апр. — Sputnik. Бишкектеги "Ала-Тоо" ресторанында уулангандардын саны 58ге жетти. Бул тууралуу Sputnik Кыргызстан агенттигинин кабарчысына шаардык Санитардык-эпидомиологиялык көзөмөлдөө борборунан билдиришти.
Буга чейин үйлөнүү тойдо 38 адам уулангандыгы боюнча маалымат түшкөн.
Санитардык-эпидомиологиялык борбордон 41 адам калаадагы инфекциялык ооруканага жаткырылганын кабарлашты. Алардын жетөө балдар. Ошондой эле дагы 17 адам амбулатордук жардам алган.
Окуяга байланыштуу шаардык Санитардык-эпидомиологиялык көзмөлдөө борбору текшерүү жүргүзүп жатат. Тойго Ысык-Көл, Нарын жана Ош облусунан 190дой мейман келген.
Буга байланыштуу окуянын чоо-жайын тактоо үчүн аталган борбордун аймактык бөлүмдөрү ишке тартылып, тиешелүү иш-чаралар жүргүзүлүүдө.
Учурда саламаттык сактоо министринин орун басары менен башкы санитардык дарыгер Олег Горин окуяны жеке көзөмөлүнө алышты.
Ал эми "Ала-Тоо" рестораны азырынча окуя боюнча маалымат бере элек.
