БИШКЕК, 9-мар. — Sputnik. Нью-Йорк шаарындагы Журналисттерди коргоо комитети (CPJ) Түркияда соттолгон 22 журналисттин эркиндикке чыгуусун талап кылууда. Бул тууралуу РИА Новости жазып чыкты.
Маалыматка ылайык, Стамбул соту дин аалымы Фетхуллах Гүленге үгүт кылгандыгы үчүн 20дан ашык ЖМК өкүлдөрүн эки жылдан жети жарым жылга чейин эркинен ажыратты.
Журналисттерди коргоо комитетинин өкүлү Нина Огнянованын айтымында, алар өзүнүн жумушун аткаргандыгы үчүн камакка алынган.
"Мамлекетке каршы ишмердүүлүк менен алектенген деп шектелген 22 журналисттин соттолгондугу түрк сот системасы үчүн уят эле. Бийлик журналистика менен терроризмди биргеликте караганды токтотушу керек. Өз ишин аткарган кесиптештер бошотулушу керек", — деди Огнянова.
Соттолгондордун арасында теле, радио, газета жана журналдарда иштеген журналисттер бар.
Буга чейин февраль айында Түркияда төңкөрүш жасоого катышкан деп аскер окуу жайынын 64 курсанты менен мугалимдер өмүр бою эркинен ажыратылган.
