Андан бери эки жыл өттү. Айзат Маматалиеванын курсактагы ошол кызы азыр бир жарым жашта. Бирок жашоо-турмуштун айынан кыздары анын жанында эмес, Таласта. Sputnik Кыргызстан агенттиги тагдырдын сыноосуна кабылган аялдын абалынан кабар алды.
— Айзат, кандай оокат кылып жатасыздар?
— Тирүү жандын күнү өтө берет экен. Өзүм азыр тигүү цехинде иштеп жатам. Кыздарымды чоң ата, чоң апасы "биз карайлы" деп Таласка алып кеткен. Жолдошум каза болгондо төрт айлык боюмда бар эле. Ошол кызым азыр бир жарым жашка чыгып, ал дагы чоң энесинин колунда. Жолдошумдун артында үч кызы калды. Улуум быйыл 9-класста окуйт. Андан кийинким үч жашта болсо, кичүүсү бир жарым жашта.
— Бул жактан окутуп, багууга мүмкүнчүлүк болгон жокпу?
— Кичинекейиңизчи, бир айлык ымыркайды кимге таштап жүрдүңүз?
— Улуу кызым бакчу, ошол учурда жайкы каникул болуп балдар жанымда эле. Жумуш жакын жерде болгондуктан, кирип-чыгып тиге берчүмүн. Кайненем да каралашып турчу.
— Жолдошуңуз барда иштечү белеңиз?
— Ооба, шаарга 2009-жылдары эле көчүп келгенбиз. Мен тигүүчү, күйөөм куруучу болчу. Кырсык болгон күнү эмнегедир жумушка баргысы келбей калып калган. Көрсө, ажал тооруп турган экен. Жумушта отурсам жеңем "Мухтар үйдөгү күчүктү сактайм деп Чоң Чүй каналына түшүп кетиптир" деп чалды. Амандыгын тилеп, калчылдап үйгө келдим. Көрсө күчүктү куткарам деп өзү суудан чыкпай калыптыр. Ал күнү сөөгүн таба албай, эртеси ӨКМдин кызматкерлери келип алып чыгышты.
— Ал эмне болгон күчүк эле?
— Азыр ал ит барбы?
— Ооба, аны Таласка кудабызга бергенбиз, мал кайтарып жүрөт. Бул жакта болсо мени көрүп эстей берип, жаман болбосун дештиби, айтор, алып кетишкен. Азыр ит көрсөм кадимкидей жаман болуп, жиним келе берет. Ажал деңизчи, бирок күчүк себепкер болгондуктан итти жаман көрүп калдым.
— Жалгыздыктын азабы жаман болсо керек?
— Жолдошумдун жогу аз келгенсип кыздарым да алыста. Төркүнүмдөн жардам деле күтпөйм. Себеби өз атам инсульт болуп 10 жылдан бери төшөктө, апам инимдин балдарын карайт. Азыр таянар тоом эле кайын журтум. Алар менен алаканы үзгөн жокмун. Мухтар барда жер алып, фундамент салганбыз. Азыр ошол үйүмдү тургузуп алайын деп жанталашып иштеп жатам.
— Кыздарыңыз көптөн бери Таласта болсо алыстап калган жокпу?
— Ортончу кызым мени "чоң апа" дейт. Мен барганда чоң ата, чоң апасын алдап "бир күн чоң апамдын жанына жатайын" деп мен кеткиче жаныма жатып, сагынычыбызды таратып алабыз. Өзүм деле тез-тез барганга аракет кылам. Улуу кызым эс тартып калды.
— Жашыңыз канчада?
— Быйыл 37ге чыгам.
— "Ургаачынын чырагы кырк" деп коет эмеспи, жаш эле экенсиз, жолу турмуш куруу оюңузда жокпу?
Мындан эки жыл мурда да Sputnik Кыргызстан агенттигинин кабарчылары Айзаттын тагдыры тууралуу материал даярдап, бир топ кайрымдуу адамдар ага көмөк көрсөтүшкөн>>
