Илбирстен исламга чейин. ТИМ Кыргызстандагы 2017-жылкы ири окуяларды тизмектеди

БИШКЕК, 31-дек. — Sputnik. Тышкы иштер министрлиги 2017-жылы Кыргызстанды эл аралык арена менен байланыштырган маанилүү делген окуяларды тизмектеди.

Сап башына Кыргызстанда 15-октябрда өткөн президенттик шайлоого дүйнөлүк коомчулуктун пикири чыккан. Андан кийинки орунда Кыргызстан менен Өзбекстандын мамлекеттик чек араларынын делимитациясы жаатындагы жетишкендиктер, Евразиялык экономикалык биримдикке Кыргызстандын төрагалык кылышы турат. Атамбаев океандын ары жагына барып, Нью-Йоркто БУУнун Башкы Ассамблеясынын 72-жыйынына катышты. Дагы бир маанилүү окуя БУУнун башкы катчысы Антонио Гуттерештин июнда келиши болду.

Түрк тилдүү элдин башын бириктирген "Алтай цивилизациясы жана Алтай тектүү элдердин форуму" жана андан мааниси кем эмес "Ислам заманга бап светтик мамлекетте" аттуу ири иш-чаралар болду. Бири маданий интеграциясына багыттар, тарыхка кайрылтса, экинчиси башкаларды дүйнөнүн глобалдуу маселесине тереңирээк үңүлүүгө чакырды. Бул экс-президент Алмазбек Атамбаевдин демилгеси менен өттү.

Табигат менен таттуу мамиледе бололу деген кеп бар. Кыргызстан августтун аягында чар тараптын өкүлдөрүн Бишкекке чогултуп, дүйнөнү ак илбирсти сактоого чакырык салды.