БИШКЕК, 18-дек. — Sputnik. Биткоин аркылуу байыган белгисиз миллионер тапкан каражатынын көпчүлүк бөлүгүн кайрымдуулукка жумшап жатканын Gizmondo порталына шилтеме берип РИА Новости жазды.
Бул үчүн ал Pineapple Fund ("Ананас фонду") деп аталган фонд түзгөн. Максаты — криптовалютанын наркынын өсүшү менен түшкөн 86 миллион долларды муктаждарга таратып берүү.
"Мен биткоин жаңы башталганда эле бул жаатка аралашкам. Кызыгы, өтө аз убакыттын ичинде өзүм каалагандан бир нече эсе көп киреше көрдүм. Ошондуктан ашыкча каражатты кайрымдуулукка берип жатам", — деп айткан атын ачыктагысы келбеген миллионер.
Pineapple Fund сайтынын маалыматына караганда, бүгүнкү күндө алты миллион долларлык жардамды сегиз уюм алды. Алар: The Water Project (таза суу тартыш аймактарга суу жеткирет), Watsi (ден соолукту чыңдоо тармагына колу жетпегендерге жардам берет) жана башкалар.
