БИШКЕК, 17-ноя. — Sputnik. Казакстандын президенти Нурсултан Назарбаев Сооронбай Жээнбековду туулган күнү менен куттуктады. Бул тууралуу жаңы шайланган президенттин маалымат кызматы билдирди.
Назарбаев өз куттуктоосунда эки элдин ортосунда салттуу болуп калган карым-катнаш уланарын белгилеген.
"Туулган күнүңүз менен чын дилимден куттуктайм. Биз салтка айланып калган бир туугандык жана кызматташтыкты өнүктүрүүнү улантарыбызга ишенем. Сиздин жакшы иштериңиз жемиштүү болуп, кубатыңыз эч түгөнбөсүн", — деп айтылат Назарбаевдин куттуктоо телеграммасында.
Сооронбай Жээнбеков 16-ноябрда 59 жашка толду. Ал 1958-жылы Ош облусунун Кара-Кулжа районундагы Тельман айылында туулган.
Жээнбеков 15-октябрда болгон президенттик шайлоодо жеңишке жеткен. Жээнбековдун инаугурациясы 24-ноябрда өтөт.
