БИШКЕК, 17-ноя. — Sputnik. Кыргызстанда 20 жаштагы бала эл аралык террордук уюмдун мүчөсү деп шектелип кармалды. Бул тууралуу Улуттук коопсуздук кызматынан кабарлашты.
Ал 14-ноябрь күнү Бишкектен кармалган.
УКМКнын маалыматына караганда, Ош облусуна караштуу Кара-Суу районунда туулган бала чет мамлекетте жүрүп социалдык тармак аркылуу террордук топтордун мүчөлөрү тарабынан үгүттөлгөн.
"Кармалган жаран "Одноклассники" социалдык тармагынын активдүү колдонуучусу болгон. Ал өзүнүн баракчасына эл аралык террордук топтун башчыларынын биринин кайрылуусун жарыялаган. Анда ал ага берилгендигин билдирген", — деп атайын кызматтан билдиришти.
Учурда Кылмыш жаза кодексинин 299-беренеси (улуттук, расалык, диний кастыкты козутуу) боюнча кылмыш иши козголду. Кармалган шектүү УКМКнын убактылуу кармоочу жайына киргизилип, тергөө амалдары жүрүүдө.
