БИШКЕК, 16-ноя. — Sputnik. Кызыл жарым ай коому Кайгуул милиция кызматкерлерине алгачкы медициналык жардам көрсөтүү боюнча тренингдерди өткөрөт. Бул туурасында аталган коомдун маалымат кызматы билдирди.
Бул боюнча Кайгуул милиция башкы башкармалыгы менен Кыргызстандагы Кызыл жарым ай коому келишим түзгөн. Ага ылайык, өлкөнүн бардык аймагындагы милиция кызматкерлери ноябрь-декабрь айларында жол кырсыгынан жаракат алгандарга алгачкы медициналык жардамды көрсөтүүнү үйрөтөт.
"Жол кырсыгы болгон учурда биринчилерден болуп милиция кызматкерлери барат. Белгилүү болгондой, каза болгон адамдардын көпчүлүгүнө Тез жардам кызматы келгенге чейин алгачкы жардам көрсөтүлгөндө аман калышмак", — деп айтылат маалыматта.
Милиционерлер эки айлык окутуудан өткөндөн кийин тест тапшырышат.
