БИШКЕК, 14-ноя. — Sputnik. Нарын облусуна көчүрүлүп келген Памир кыргыздары медициналык кароодон өтүп, окуусун улантып жатышат. Бул тууралуу вице-премьер Чолпон Султанбекованын этникалык кыргыздар жашай баштаган Куланак айылына барганында белгилүү болду.
Райондук үй-бүлөлүк дарыгерлер тобунун башчысы Сыяпат Сырдыбаеванын айтымында, ар бир памирликке медициналык карта ачылды.
"Улуттук программанын негизинде эмдөө башталып, шал, кептөөр, кызылча ооруларына каршы эмделишти", — деди дарыгер.
Вице-премьер кандаштар билим алып жаткан класска баш багып, окуунун жүрүшү менен таанышты.
"Окуйм деген балдарга тоскоолдук кылбашыбыз керек. Мындан тышкары, ар бириңер эмгекке умтулуп, өз арабаңарды өзүңөр тартууга үйрөнүшүңөр керек", — деди Султанбекова.
Эске салсак, ушул жылдын октябрь айылында Памирде жашаган 33 этникалык кыргыз тарыхый мекенине өкмөт тарабынан көчүрүлүп келип, Куланак айылына отурукташкан.
