БИШКЕК, 6-ноя. — Sputnik. Президент Алмазбек Атамбаев журналисттерди басма сөз майрамы менен куттуктады. Бул тууралуу президенттин маалымат кызматы билдирди.
Куттуктоодо маалыматтын маанилүүлүгү жана чечим кабыл алуудагы ролу баса белгиленди.
"Кыргызстан өз чөлкөмүндө сөз эркиндиги боюнча алдына эч кимди сала элек, муну эч ким жокко чыгара албайт. Бирок журналистика чындыкка гана негизделиши керек. Журналисттин сөзү курч жана айныгыс фактылар менен далилденип турушу шарт", — деп жазылат маалыматта.
Өлкө башчы учурда Кыргызстандын биримдиги жана элдин ынтымагы баарынан өйдө турганын белгилеп, журналисттерди жоопкерчиликтүү болууга үндөдү.
