БИШКЕК, 3-ноя. — Sputnik. Жумага караган түнү эки кабаттуу мансард тибиндеги турак жай жана үч унаа күйүп кеткенин ӨКМдин маалымат кызматы билдирди.
Кырсыкка күбө болгон адам өрттү телефондун камерасына тартып, Instagram баракчасына жарыялаган.
Өрт өчүрүүчүлөрдүн айтымында, турак үй Люксембург жана Гагарин көчөлөрүнүн кесилишинде жайгашкан. Үй менен кошо Sprinter, "Жигули" жана "УАЗ" унаалары күйүп кеткен.
Болжол менен түнкү саат 1.30дарда чыккан өрттү өчүрүүгө үч өрт өчүрүүчү бөлүм, көчмө байланыш пункту менен ыкчам топ, 7 куткаруучу тартылган. Алдын ала маалымат боюнча жабыркагандар катталган эмес. Аткарылган иш-чаралардын негизинде саат 02:36да өрт чектөөгө алынып, саат 07:07де толук өчүрүлдү. Өрттүн чыгуу себептери жана материалдык чыгымдары такталууда.
