Жогорку Кеңештин депутаты Өмүрбек Текебаев мыйзамдын негизинде мандатынан ажыратылгандыгын БШК төрайымы Нуржан Шайлдабекова Sputnik Кыргызстан агенттигинин кабарчысына билдирди.
Эске сала кетсек, БШК бүгүн жыйын куруп, Өмүрбек Текебаевди мандатынан ажыратты.
Жыйын алдында БШК төрайымы Нуржан Шайлдабекова Текебаевдин жактоочусунан депутатты мандатынан мөөнөтүнөн мурда ажыратуу маселесин кийинкиге жылдыра турууну суранган кат келгенин айтты. Жактоочу кайрылуусунда Жогорку сот буга чейинки эки инстанциянын чечимин жокко чыгарып калышы мүмкүндүгүн белгилеген.
"Өмүрбек Текебаевдин мандатын алуу боюнча кадамдар мыйзамдын негизинде ишке ашырылды. Бул Конституциянын талабы", — деди Шайлдабекова.
Белгилей кетсек, 16-августта Бишкек шаарынын Биринчи Май райондук соту Өмүрбек Текебаев менен Дүйшөнкул Чотоновду коррупция беренеси боюнча айыптуу деп таап, ар бирин сегиз жылга эркинен ажыраткан. 2-октябрда Бишкек шаардык соту биринчи инстанциянын өкүмүн күчүндө калтырган.
