БИШКЕК, 6-окт. — Sputnik. Тажик тарап Кыргызстан менен талаштуу жерге чек ара комендатурасын куруп алгандыгы тууралуу маалымат чындыкка дал келбейт. Бул туурасында Sputnik агенттигине КРдин мамлекеттик чек ара кызматынан кабарлашты.
Буга чейин кайсы мамлекетке таандык экендиги тактала элек аймакка комендатуранын курулгандыгы жана анын расмий ачылышы болгондугу тууралуу маалыматтар тарап, бирок кайсы жерде экендиги так айтылган эмес.
Чек ара кызматынан Тажикстандын УКМКсынын чек ара күчтөрү Согди облусунун Ганчин районундагы Муряк айылында аталган жай тургузулгандыгын билдиришти. Объект кыргыз-тажик мамлекеттик чек арасынын шарттуу деп белгиленген жеринен 5-6 чакырым аралыкта экендиги айтылган.
Аталган ведомстводон учурда абал тынч экендигин кошумча билдиришти.
