БИШКЕК, 27-сен. — Sputnik. Борбор калаанын чок ортосунда эл ташыган маршрутка менен жол тандабас кагышып, маршрутка жолдон чыгып токтогон. Бул тууралуу Sputnik Кыргызстан агенттигинин кабарчысы жеринен билдирди.
Жол кырсыгы саат 20:00дөр чамасында Киев көчөсү менен Эркиндик проспектисинин кесилишинде катталган.
Маалыматка ылайык, №212 маршрутка Киев көчөсү менен батышты көздөй бараткан. Ал Эркиндик проспектиси менен ылдый келе жаткан жол тандабас менен кагышкан.
Жол кырсыгынан кийин маршрутка жолдон чыгып, тротуарга чыгып токтогон. Кырсык болгон учурда бустун ичинде 30га жакын киши болгон. Алардын көбү жеңил жаракат алышкан.
"Окуяга күбө болгондор жаракат алгандардын арасында кош бойлуу аял да бар экенин айтышты. Ал башкаларга караганда катуу жабыркаган. Аны жана башка кишилерди Тез жардам кызматы алып кетти. Кырсык болгон жерге экинчи Тез жардам кызматы дагы келди", — деди кабарчы.
Шаардык Кайгуул милиция башкармалыгынын маалымат кызматы жол кырсыгы катталган жерге инспекторлор чыгып кеткенин билдиришти.
