Sputnik Кыргызстан агенттигинин кабарчысы атайын жүргүзүлгөн рейдге катышып келди.
Алгач эле Lexus LX470 унаасын башкарып бара жаткан айымды токтоткондо анын айдоочулук күбөлүгү жанында жок болуп чыкты. Жаңы гана үйүнөн чыкканын айтып күбөлүгүн алып келе коём деп унаасын айып короого киргизүүгө караманча каршы турду.
"Мен ушул тушта эле жашайм. Шашып жатып айдоочулук күбөлүгүмдү үйгө унутуп коюптурмун. Инспекторлор үйүңүзгө барып айдоочулук күбөлүгүңүздү алып келебиз деген. Бирок ачкычты алып рулга отургандан кийин минтип айып короого алып келип коюшту. Азыр мен ооруканага барышым керек", — деди айдоочу.
Айып короогого токтотулгандан кийин жолдошу анын айдоочулук күбөлүгүн алып келди. Анан "жөн жерден айып пул төлөбөйм, унаамды азыр алып кетишим керек" деп милиционерлерге көпкө чейин каршылык көрсөттү. Ага карабай протокол түзүлдү да, жолубузду уладык.
Андан кийин терезелеринин төрт тарабы тең караңгылатылган ак түстөгү Toyota Camry унаасы токтотулду. Анын айдоочусу бир нече мүнөт унаадан түшпөй отуруп алды. Документтерин көрсөтпөй унаасынын ичинде да, сыртка чыгып да ар кимге чалып жатты. Кийинчерээк анын жанында документтери жок экени белгилүү болду. Мындан улам унаасы түз эле айып короого жеткирилди.
