АСТАНА, 10-сен. — Sputnik. Казакстандагы "ЭКСПО-2017" эл аралык көргөзмөсүнө 2 миллиондой адам келсе, дагы бир миллионго жакыны кезекте турат. Бул тууралуу "Астана ЭКСПО-2017. Улуттук компаниясы" акционердик коомунун жетекчисинин орун басары Алишер Пирметов журналисттерге айтып берди.
Ал көргөзмө аяктары менен ЭКСПО шаарчасы дароо жабылбай, кызыккандардын аягы суугуча иштээрин айтты.
"Жергиликтүү элден сырткары жарым миллионго чукул чет өлкөлүктөр келди. Бул жерди иш-чара соңуна чыгаары менен дароо жаап салбайбыз. Анткени шаарчанын көргөнү кызыгып дагы 1 миллиондон ашык адам кезекте турат", — деди Пирметов.
Ал аталган "ЭКСПО-2017" эл аралык көргөзмөсүндө 1,3 млрд. доллар сарпталгандыгын айтты.
"Бул каражат эл аралык көргөзмөгө ылайыкташылган павильондорду жана ЭКСПО шаарчасын курууга жумшалды", — деди Пирметов.
Эске салсак "Келечектин энергиясы" аталышындагы "ЭКСПО-2017" эл аралык көргөзмөсү 10-июнда ачылып, ал эми эртең, 10-сентябрда расмий жабылышы болот.
Буга 100гө жакын өлкө жана эл аралык уюмдар катышып, анын алкагында ар тармак боюнча бир нече иш-чаралар өттү.
