Окуучума арак сатканда жүрөгүм тилинет... Мугалимдер жайкысын кантип жан багат

Кыргызстандык мугалимдин орточо маянасы — 13 824 сом. Бирок педагогдордун баары эле мындай сумманы ала беришпейт, көпчүлүгүнүн айлыгы 10 миң сомдон ашпайт.

Sputnik Кыргызстан агенттигинин бул материалында жарыбаган айлыкка наалып отура бербей жан үрөгөн мугалимдердин (ысымдары жашырылды) баяндары камтылды. Жайкы эмгек өргүүсүндө алар эс албастан, үй-бүлөсүн багуу үчүн эч бир иштен жийиркенбей мээнеттенишет.

Малканадагы иш. Биология мугалими

Орто жана жогорку класстарга биология жана химиядан сабак берем. Айылда турабыз, ал жакта маяна аз, маселен мен бардык кошумчасы менен 10 миң сом алам. Окуу жылы аяктаганда жолдошума малканада жардам берем. Уй союп, жиликтейбиз. Анан мен базарга чыгып сатам.

Базарда иштөө мага абдан ыңгайсыз — окуучуларымдын өздөрүн же ата-энелерин көрөм. Андай кезде жердин түбүнө кирип кетким келет! Эжей болуп туруп базарда соода кылам. Бирок башка арга жок, андан бөлөк иш таба албайм. Пенсияга чыгаар маалга чейин эмне болуп кетерин ким билет, бирок бир маянага балдардын курсагын тойгуза албасымды жакшы түшүнөм.

Пол жуугуч. Орус тили мугалиминин турмушунан

Жайкысын Кыргызстандын мыкты аталган пансионаттарынын полун жууйм, унитаздарын тазалайм, шейшептерин алмаштырып, сүлгүлөрүн жууйм. Укмуш ийгиликтүү жана келечектүү иш таба албаганымдан уялбайм. Күзүндө кайрадан орус тили мугалимине айланам. Азырынча унчукпастан, чайпулга берешен бай эс алуучулардын көлөкөсүндө иштеп турам. Мында бир сезондо мектептеги бир жылдык маянамды таап алам. Ушул тапканым менен балдарымды жогорку окуу жайларында окутуп жатам. Кимдир бирөө келип бул абалымды өзгөртүп жиберет деп күтпөйм. Өзүмө гана ишенишим керектигин так билем.

Сатуучу. Физиктин баяны

Окуу жылында деле сабактан кийин азык-түлүк дүкөнүндө кошумча иштейм. Мектепте Архимед мыйзамдарын окутуп, формулаларда сүрүлүү күчүн көрсөтсөм, дүкөндө мага жөн гана "эже" деп кайрылып, колбасадан тилим кесип, арзан арак берүүмдү өтүнүшөт.

Мектепти аяктаганына аз эле болгон жаш балдар ичимдик алууга келгенде жүрөгүм тилинет. Мени көргөндө жүздөрү кызарат, бирок арак ичкендерине эмес, мугалими аларга ичимдик сатып жатканынан уялышат.

Шыбакчы. Башталгыч класс мугалиминин турмушунан

25-майдагы акыркы коңгуроодон кийин да дээрлик сентябрга чейин мектептен кетпейм. Уулдарымды жаңы окуу жылына камдоо үчүн мектептин ремонту менен алек болом: актайм, парталарды сырдайм, дубалдарды шыбайм. Баарын өзүм жасайм. Балдар таенесиникинде же лагерде эс алышат. Жолдошум жок, ошондуктан, бардык жүк өз мойнумда. Жайындагы кара жумушка да, башталгыч класстын окуучулары менен болгон ызы-чууга да кайыл боло эч качан наалыбайм. Анын кимге пайдасы бар?..

Ата-энелер мектептин ремонтун жасарымды билишет. Балким, мени аяшар, бирок мен андай мамиледен, көз караштан абдан жаман болом. Окуу жылында айына 11 миң сом алсам, шыбак иштеринен бир нече жаңыртылган класс үчүн 20 миң сом табам.