БИШКЕК, 15-авг. — Sputnik. Шейшемби күндөн тарта Орус-кыргыз өнүктүрүү фондусу чакан жана орто ишкердик үчүн сом менен берилген насыялардын үстөгүн 10 пайызга дейре азайтты. Бул тууралуу фонддун маалымат кызматы билдирди.
Мындай чечим фонд башкармалыгынын акыркы жыйынында кабыл алынып, Кыргызстанда чакан жана орто ишкердикти колдоо максатын көздөйт.
"Буга чейин сом менен берилген насыянын үстөгү жылына 12 пайыз болчу. Ал эми өнөктөш банктар аркылуу берилген долларлык насыянын үстөгү мурдагыдай эле 5 пайыз боюнча калды", — деп айтылат маалыматта.
Көлөмү миллион долларга жеткен сомдук насыяны фонддун өнөктөшү болгон 13 банк аркылуу алууга болот. Иштей баштаганына 23 айдын жүзү болгон фонд 246 миллион доллардык 758 долбоорду каржылаган. Анын ичинен 727 долбоор чакан жана орто бизнеске тиешелүү.
