БИШКЕК, 25-июл. — Sputnik. Майда чиптерди чыгаруу менен алектенген Three Square Market ишканасы өзүнүн кызматкерлеринин колуна микрочип киргизип берчү АКШдагы алгачкы фирма болгону турат. Бул тууралуу ВВС жазды.
Аталган фирманын өкүлдөрү баасы 300 доллар турган чипти акысыз койдурмай болушту.
Учурда компаниянын 50 кызматкери чип тактырууга өз макулдугун беришти.
Макалада жазылгандай, бул ыкма АКШда биринчи жолу колдонулуп жатканы менен Швеция мамлекетинде BioHax деп аталган компания жок эле дегенде үч жылдан бери каалоочуларга чип коюп берип келет.
Three Square Market жана BioHax компаниялары жаңы технологияны гениалдуу деп эсептегендигин билдирген.
"Жакынкы арада адамдар өзү тууралуу бардык маалыматтарды жана акчасын манжаларынын ортосундагы буюмда (чип бармак менен сөөмөйдүн ортосуна коюлат — ред.) алып жүрүүнү каалап калат", — деп айтышкан.
Коомчулукта бул чип аркылуу адамды көзөмөлдөсө болобу деген суроого алар төмөнкүчө жооп беришкен.
Three Square Market компаниясынын вице-президенти Тони Даннанын айтымында, чип адамдын баскан-турганы тууралуу маалымат бере албайт.
"Бул кадимки эле кредиттик картанын чибиндей. Аны коюп кайра алып чыгууга дагы эки гана секунд жумшалат. Күрүчтүн данындай болгон чипти атайын шприц менен сайып, кайра алаарда кадимки тикенек сыяктуу сууруп алса болот", — деген Данна.
Анын айтымында, аталган чиптер адамдын жашоосун жеңилдетет. Анткени учурда киши капчыгына салып жүргөн майда-чүйдө маалыматтардын баары ушул чиптин ичине батып кетет.
