БИШКЕК, 10-июл. — Sputnik. Борбор калаанын мэриясы Пионер жана Комсомол көлдөрүн тазалоо иштери толук бүтмөйүнчө шаардыктарды сууга түшпөй турууну өтүндү.
Маалыматка ылайык, көлдөрдү тазалоо иштери бүткөндөн кийин Санитардык-эпидемиологиялык көзөмөл борбору көлдөрдүн сууларын текшерет жана лабораториялык анализдердин жыйынтыгына карата сууга түшүү убактысын белгилейт.
"Ошондон кийин гана жарандардын саламаттыгына зыян келтирип алуу кооптуулугу жаралбайт", — деп айтылат маалыматта.
Пионер жана Комсомол көлдөрүнүн түбү алты гектарды түзөт. Ал эми тунманын жалпы аянты 0,7 гектар. Мэриядан "Зеленстрой" муниципалдык ишканасы Кара-Жыгач токоюнда жайгашкан Комсомол жана Пионер көлдөрүнүн түбүндөгү чөгүндү, тунмаларды тазалоо иштерин 15 жылдан бери биринчи жолу жүргүзүп жатканын билдиришти.
Алдын ала маалыматтар боюнча сууга түшүү мезгили июль айынын орто ченинде ачылары күтүлүүдө.
