Жарыкчылыкка келгенден киши баласы өргө умтулат. Жерден боорун көтөрүп, өйдөлөп өсөт. Бири эки болуп, уул-кыз табат. Ал эми өргөө көтөрүү киши турмушундагы өзөктүү учур, өзгөчө бийиктик.
Өрлүктөөнүн мааниси
Өрлүктөө салты менен катар бир топ ырым жөрөлгөлөр аткарылат. Курмандык чалынат, ак чачылат, аласталат, чачыла чачылат, бата тиленет.
Жөрөлгөлөрдүн мааниси
Аластоо – конушту тазалоо, аруулоо максатында арча түтөтүп, жакшы тилегин айтып болочок өргөөнү жаакшылыктын чордону болсун деген ниетте аласташкан.
Курмандык чалуу – жаңы көтөрүлгөн өргөөнүн ырыска шерик, жакшылыкка жанаш болушун тилеп, Кудай жолуна, арбак жолуна мал союп кан чыгарышкан.
Көрүндүк – өрлүктөп келген киши куру кол келбей, жаңы үйгө ак тилегин уюткан белегин же кошумчасын ала келет. Муну ыражанын бир түрү катары да караса болот. Болбосо, жакынынын жаңы өргөөсүн куттуктаганы катары кабылданат.
Конушка бата
Өрлүктөө кут уюткан, дөөлөт чакырган бата менен жыйынтыкталат. Батаны боюнда кубаты, жүзүндө нуру, оозунда сөзү бар сөөлөттүү аксакалдар берет.
Конушуң жайлуу болсун,
Өрүшүң малдуу болсун.
Өргөң башка толсун,
Казаның ашка толсун.
Жаңы үйүң жарык болсун,
Башыңарга бакыт консун.
Ушул үйдөн уул үйлө,
Урматка толсун бүлө.
Үйүңдүн,
Түндүгү бийик болсун,
Уугу узун босун.
Керегеси кенен болсун,
Кенемтеси белен болсун.
Оомийин!!!
Ырымын жасабаса, орду томсорот
