БИШКЕК, 21-июн. — Sputnik. Бишкек — Ош унаа жолуна кар көчкүдөн коргой турган узундугу 460 метрлик тоннель салынышы күтүлүүдө. Бул тууралуу Жогорку Кеңештин маалымат кызматы кабарлады.
Билдирүүгө ылайык, тоннель Япониянын гранттык каражатына трассанын 246-чакырымына курулат.
"Мындай тоннель жолду көчкүдөн коргойт. Бул багытта Япония Кыргызстанга 4 миллиард 200 миллион йен (38,2 миллион доллар) көлөмүндө акча бөлмөй болду", — деп жазылат маалыматта.
Белгилей кетсек, 2007-2015-жылдар аралыгында Япония Кыргызстанга үч жолу гранттык каражат бөлүп, ага 561 жол техникасы сатып алынган.
