БИШКЕК, 16-июн. — Sputnik. Швейцариянын эл аралык кызматташуу боюнча Хельветас Свисс Интеркооперейшн уюму Бишкек шаарынын чет жакасындагы Пригородное айылында жашаган майып аялдын үйүн оңдоп жылуулап берди. Бул тууралуу аталган уюмдун мүчөлөрү билдирди.
Ага ылайык, үйү жылууланган Розгүл Кызбаева II топтогу майып болуп, баласын жалгыз чоңойтуп келген.
"Майып болуп калып учурда пенсияга жашайбыз. Ден-соолугума байланыштуу кийин иштей албай калдым. Астыбыздан сыз өтүп, үстүбүздөн жаан-чачын таамп кыйналып турган учурубузда үйүбүздү көрүп жардам берели дешти. Мурда каражат тартыштыгынан улам жөн эле цементтин үстүнө линолеум төшөп, анын үстүнө жылуу төшөк салып коюп жашачубуз. Азыр баары жылууланды. Балам аябай сүйүнүп, окуусун дагы жакшы окуй баштады", — деди Кызбаева.
Аталган уюм жакыр адамдардын үйүн жылуулагандан тышкары айылдагы жумушсуз жүргөн курулушка шыгы бар жаштарды чогултуп, үйдү жылуулоо боюнча тренинг өтүп, үйрөтөт.
