Жалал-Абаддын тургуну Шахноза Абдуманап кызы катардагы балдардай эле чоңоюп, эч өзгөчөлөнгөн эмес.
"Сокур ичегимди алдырганда дарыгерлер менин ички органдарымдын орду алмашып жайгашканын айтышты. Мисалы жүрөгүм сол жакта эмес, оң жакта экен", — деди ал.
"Боюмда болгондон кийин колдорум жана эриндерим көгөрүп чыкчу. Тилекке каршы, түйүлдүктү алдырууга туура келди. Мындан улам жолдошум таштап кетти. Менин абалым аябай оор эле", — деп өткөн күндөрүн эстеди Шахноза.
Ошол кезде ал бир топ татаал операцияларды башынан өткөргөн.
Жүрөк кемтиги хирургиясынын бөлүм башчысы Самидин Шабыралиевдин айтымында, ички органдардын орун алмашып жайгашуусу ден соолукка бир топ терс таасир берет.
"Бейтаптардын 90 пайызы декстрокардия — жүрөк кемтиги менен төрөлөт. Алардын сол жактагы ички органдары оң жакка, оң жактагылары сол жакка жайгашып калат. Андан сырткары, дени сак кишилердин боору оң тарабында болсо, булардыкы сол тарапта, ашказаны оң жакта жайгашат", — деди ал.
Азыр Шахнозанын ден соолугу жакшы. Учурда ал турмушка чыгуу боюнча ойлоно элек, кийин медайым болуп иштеп кишилерге жардам бергиси келет.
Беловодское айылынын 5 жаштагы тургуну Даниэлдин да жүрөгү оң тарабында жайгашкан. Ага олуттуу операция жасалышы керек. Бирок анын чоң атасы Байгазы Аламанов небересине медициналык процедура үчүн наркоз сайышканын, уйкудан жаңы ойгонгондуктан чырдап жатканын айтты.
Хирург Самидин Шабыралиев кичинекей Даниэлге оор операция жасаларын айтып, төрт кемтикти бир операция менен калыбына келтирүү керектигин кошумчалады.
