БИШКЕК, 23-май — Sputnik. Москвада кыргызстандык келин аны карактап кетүүгө аракет кылгандарга каршылык көрсөтүп, аман калды. Бул тууралуу укук коргоо органдарына таянуу менен "Москва" жаңылыктар агенттиги билдирди.
Маалыматка ылайык, полицияга Москвада батирде жашаган 38 жаштагы Кыргызстандын жараны кайрылып, сейил бактан белгисиз эки адам кол салганын айткан.
"Кишилер келиндин сумкасы менен кол телефонун жулуп кетүүгө аракет кылышкан. Бирок аял каршылык көрсөтүп, эркектер качып кетүүгө аргасыз болушкан", — деп айтылат билдирүүдө.
Кийинчерээк каракчылардын бири кармалып, ал Кыргызстандын 32 жаштагы жараны экени аныкталган. Бул факты боюнча кылмыш иши козголуп, полиция кармалган кишинин шеригин издеп жатат.
