БИШКЕК, 13-май — Sputnik. Ысык-Көлдө Жыл сайын өтүүчү эл аралык Run the Silk Road марафон жарышынын жеңүүчүлөрү белгилүү болду.
Уюштуруучулардын айтымында, эки миңден ашуун адам катышкан. Ага Россия, Казакстан жана Япониядан да спортчулар келишкен. Жөө күлүктөр Чолпон-Аттадагы ат майдандан Корумду айылына чейин барып, кайра артка кайтышкан.
Жарым марафондун жеңүүчүсү болуп кыргызстандык Султан Айдар уулу (21 чакырым 97 метр) аталса, кыз-келиндер арасында биринчиликти казакстандык Катерина Шатная багындырган.
Баш байгеге жетишкен жөө күлүктөр миң доллар акча менен сыйланды.
Эл аралык "Run The Silk Road" марафону быйыл алтынчы ирет өтүүдө. Иш-чара 1980-жылы Олимпиада оюндарында 3-орунга ээ болгон кыргызстандык жөө күлүк Сатымкул Жуманазаровдун жаркын элесине арналат.
