БИШКЕК, 13-май. — Sputnik. Жогорку сот MegaCom компаниясынын башкы директорунун мурдагы кеңешчиси Алмаз Абековго карата Биринчи Май райондук сотунун чечимин күчүндө калтырганын аталган мекеменин маалымат кызматынан билдиришти.
2012-жылы январда УКМК "Альфа Телеком" ЖАКтын ишинен коррупциялык схемалар аныкталып, компаниянын эсебинен 142 миллион сом мыйзамсыз чыгарылганы айтылган. Кийин УКМК уюлдук компаниядан оффшордук аймакка кошумча 6 миллион доллар чыгарылып кеткенин билдирген.
Алмаз Абековду Бишкек шаарынын Биринчи Май райондук соту 25 жылга эркинен ажыраткан. Аны менен бирге "Альфа Телеком" компаниясынын мурдагы башкы директору Азамат Мурзалиев 12 жылга, "Новострой Сервис" ЖАКтын башчысы Кенжебек Аман уулу 8 жылга кесилген.
Жогорку соттун жазык иштери жана административдик укук бузуулар жөнүндөгү иштер боюнча соттук коллегиясынын токтому менен Бишкек шаардык сотунун 2016-жылдын 28-ноябрындагы өкүмү күчүндө калтырылды.
