БИШКЕК, 13-май — Sputnik. Жалал-Абад облусунун Аксы районундагы Авлетим айыл аймагы аркылуу агып өткөн дарыяда суунун деңгээли көтөрүлүп жашоочуларга кооптуулук жаралган. Бул туурасында ӨКМдин маалымат кызматы кабарлады.
Билдирмеге караганда, күндүн табы көтөрүлгөнүнө байланыштуу тоодогу кар эрип, Авлетим дарыясындагы суунун деңгээли көтөрүлүп 17 жерден ашып кетүү коркунучу пайда болгон.
"Суунун агымы май айындагы нормадан 12 куб метрге ашып түшкөн. Бул Байкашка-Терек айылында 36, Арал айылындагы 43 турак жайга кооптуулук жараткан. Мындан сырткары, Товар-Сай айылындагы 67 кожолукту тейлеген унаа өтүүчү көпүрөнү алып кетүү коркунучу пайда болду", — деп айтылат маалыматта.
Түзүлгөн кырдаалга байланыштуу Авлетим айыл аймагына өзгөчө кырдаал киргизилип, өтө кооптуу аймакта жашаган 15 үй-бүлө көчүрүлгөн.
Кырсыктын алдын алуу жана жеринде чараларды көрүү үчүн ӨКМдин Жалал-Абад облустук башкармалыгынын башчысынын убактылуу милдетин аткарып жаткан Абдишарип Бекилов жетектеген ыкчам топ иш алып барууда. Окуя болгон жерге 17 атайын техника тартылган.
