БИШКЕК, 4-май. — Sputnik. АКШнын Нью-Йорк шаарында бир ай мурда жоголгон кыргызстандык Азиз Чиркеевдин сөөгү табылды. Бул тууралуу Sputnik Кыргызстан маалымат агенттигинин кабарчысына анын таанышы Бек Татибеков билдирди.
Татибековдун айтымында, жоголгон бала менен табылган адамдын бир экендигин аныкташ үчүн бир топ убакыт сарпталган.
"Ушул күнгө чейин белгисиз болуп жаткан бейтааныш адамдын сөөгү 30-апрелде Нью-Йорк шаарынын Сансет паркынын айланасындагы Ист-Ривер дарыясынын жээгинен табылган. Бүгүн АКШнын иммиграциялык кызматынын берген маалыматтары боюнча сөөк Азиз Чиркеевге таандык экени аныкталды. Ошондой эле анын манжа издери жана рентген сүрөттөрү дагы дал келди", — деди Татибеков.
Учурда полиция Чиркеевдин өлүмүнүн себептерин териштирип жатат.
Ал ортодо АКШдагы кыргыз мекендештер каза болгон адамдын сөөгүн мекенге жиберүү үчүн анын жакындарына жардам катары акча чогулта баштады.
