БИШКЕК, 9-апр. — Sputnik. АКШнын Нью-Йорк шаарында иштеп жүргөн 20 жаштагы кыргызстандык Азиз Чиркеев дайынсыз жоголгонун Sputnik Кыргызстан агенттигине анын жакын таанышы Жаныбек билдирди.
Анын айтымында, андан 3-апрелден бери кабар жок болууда. Аны мекендештери жана полиция кызматкерлери издеп жатышат.
Жаныбек билдиргендей, Азиз Чиркеев Нью-Йоркто бир жылдан бери иштеп жүргөн.
Туугандары социалдык тармактарга тараткан билдирүүдө полиция анын телефон номерин жана ноутбугун текешергенде шектүү нерселер табылбаганын жана акыркы жолу апасы менен сүйлөшүп, жумуштан чыгып сейилдеп жүргөнүн айтканы жазылат.
"Мобилдик операторлордон алынган маалыматта 6-апрель күнү анын телефону жандырылып, бирок кайра эле өчүрүлүптүр", — деп мекендештер билдирди.
Жекшемби күнү эртең менен саат 9да (Нью-Йорк убактысы боюнча) туугандары жана тааныштары Брайтон-Бичке чогулуп анын жоголгондугу туурасында маалыматтарды кагазга жазып метро станцияларга жана уруксат берилген жайларга жабыштырууну пландап жатышат.
