БИШКЕК, 27-апр. — Sputnik. "Дыйканды" жапса мэрия Кыргызстандагы ири дүң базардан айрылат. Бул туурасында бүгүн Sputnik Кыргызстан мультимедиалык борборунда өткөн маалымат жыйында базардын директорунун орун басары Талип Ташибаев билдирди.
20-апрелде Ленин районунун акими Нурдин Тынаев базар ишин 21-апрелде токтоторун билдирген эле.
"Сары-Өзөн" базары ыңгайсыз жерде, аэропортко кеткен трассада жайгашкан. Бул соода кылгандарга ылайыктуу эмес, себеби, аталган жол сырттан меймандар келген учурда көп жабылат. Андан сырткары, унаа токтотуучу жайлардын саны да аз. Биздин бир катар ижарачылар "Дордой-Дыйканга" барып, бирок ал жактагы начар шарттардан улам кайра келишти", — деди Ташибаев.
Ал эгерде бийлик "Дыйкандын" ишин токтотсо, өлкөдөгү ири дүң базардан айрыларын айтты.
"Сары-Өзөн" жана "Дордой-Дыйкан" базарында ижара акысы жогору. Биздин соодагерлерге "Дыйканда" соода кылган эле ыңгайлуу жана алар аталган жайдан кеткиси келген жок", — деп кошумчалады Ташибаев.
Өткөн жылдын октябрь айында Мамэкотехинспекциясы базар өрт коопсуздугунун талаптарына жооп бербей турганын жана антисанитардык абалда экенин аныктаган.
Ошондой эле базар менен нефть базасынын аралыгы 30 метрди гана түзөт. Эреже боюнча мунай сакталган жайдын алыстыгы 100 метрден кем болбошу керек деп билдирген аталган инспекция.
Экинчи себеп катары мэрия менен болгон пикир келишпестик деп айтылып келет. Буга чейин аталган базарда иштегендер мындай өзгөрүүгө каршылыгын билдирип чыгышкан.
