БИШКЕК, 21-апр. – Sputnik. Экспертиза көрсөткөндөй окуучуларды койдуруп кетүүгө шектелген айдоочу учурда мас абалда экенин Sputnik Кыргызстан агенттигине Бишкек шаарынын Кайгуул милициясынан билдиришти.
Бүгүн Бакаев менен Ремесленная көчөлөрүнүн кесилишинен Mercedes-Benz С-class үлгүсүндөгү унаа №74 мектептин 3-классынын эки окуучусун койдуруп, кырсык болгон жерден качып кеткен.
Айдоочу жети сааттан кийин табылды.
"Экспертиза көрсөткөндөй учурда айдоочу мас абалда. Өзү болсо балдарды койдуруп алгандан кийин ичкенин айтып жатат. Кармаган маалда ал унаанын ичинде отурган", — деп айтылат билдирүүдө.
Саламаттыкты сактоо министрлигинен билдиришкендей, кырсыкка кабылган он жаштагы баланын башы, ички органдары жаракат алып, сол ийини сынган. Ал эми экинчи өспүрүмдүн башы жана ички органдарынан сырткары, эки тизеси, омурткасынын жогору жагы сынып кеткен.
