БИШКЕК, 17-апр. — Sputnik. Бишкекте жол кырсыгына кабылып, оодарылып калган №199 маршруттук таксини иштеткен "Мейкин" компаниясы эл ташууга уруксат берген лицензиясынан ажыратылышы мүмкүн. Бул тууралуу шаар мэриясы билдирди.
Бул жол кырсыгынан жети адам жаракат алып, анын бири жаш бала болгон. 14 жаштагы өспүрүм шаардык балдар клиникалык ооруканасына жеткирилип, анын баш мээси чайкалганы аныкталган. Кайгуул милициясынын алын ала маалыматы боюнча маршрутканын айдоочусу жол чырактын кызыл белгисине өтүп кеткен.
"Окуянын себептери эки жумада айтылат. Эгер маршруттук такси айдоочусунун күнөөсү аныкталса, ал таандык болгон "Мейкин" фирмасынын эл ташууга уруксат берген лицензиясын алуу маселеси көтөрүлөт", — деп айтылат билдирүүдө.
Муниципалитет жеке компаниялар менен мамилени жөнгө салуу үчүн каттамдарды бөлүштүрүү боюнча сынак жарыяланганын белгиледи. Сынактын жыйынтыгы менен коопсуз жана сапаттуу тейлөө, ошондой эле айдоочулардын жоопкерчилигин катаалдатуу каралган келишимдер түзүлмөк.
"Бирок январга чейин созулган соттук териштирүүлөрдөн улам сынак токтоп калган. Эми мэрия аны жандантуу аракетин көрө баштады. Сынактын жыйынтыгы менен белгиленген тартипке жооп бербеген микроавтобустардын айдоочулары иштен алынат", — дешти муниципалитеттен.
Мэрия калкты тейлөөнүн сапатын жакшыртуу үчүн микроавтобустарды автобус менен троллейбустарга этабы менен алмаштыруу боюнча аракеттер көрүлүп жатканын кошумчалады.
