БИШКЕК, 7-апр. — Sputnik. Бишкекте 2010-жылы апрель окуясында жоголгон курал-жарактардын теңин жарандар азыркыга чейин өткөрүп бере элек. Бул тууралуу Sputnik Кыргызстан агенттигине Бишкек ШИИБдин коомдук коопсуздук башкармалыгынын лицензия берүү системасынын бөлүм башчысы Эркинбек Курманалиев билдирди.
Анын айтымында, ошол убакта шаарда жалпы ар түрдүү типтеги 608 курал-жарак жоголсо, анын 309у өткөрүлүп берилип, 299у эл ичинде калган.
"Ошол учурда граната, автомат, тапанчалар жоголгон. Эгерде жарандар кимдир-бирөөнүн үйүндө курал-жарак сакталып турганын билсе, өз эрки менен өткөрүп берүүгө жардам берсе жакшы болмок. Бул үчүн эч кандай административдик же кылмыш жаза каралбайт", — деди Курманалиев.
Бишкек ШИИБдин маалымат кызматынын берген билдирүүсүнө ылайык, 2010-жылы өз эрки менен курал-жарак өткөрүп бергендерге акчалай сыйлык ыйгарылат деген токтом чыккан. Бирок азыр бул чечим кайра артка кайтарылып алынган.
