БИШКЕК, 5-апр. — Sputnik. Улуу Британия, Канада жана Италия өлкөлөрүндө төрөлгөн ымыркайлар ыйлаак болорун Journal of Pediatrics журналындагы макалага таянып РИА Новости жазып чыкты.
Анда көп убарага салбаган наристелер Япония, Германия жана Данияда жарыкка келери айтылат. Балдар алгачкы күндөрүндө эле ыйлаактыгы боюнча бири-биринен айырмаланарын белгилеген окумуштуулар алардын иликтөөсү буга эмне себеп экенин билүүгө өбөлгө болот деп эсептешет.
"Баланын ыйлаак болушу эмнеге байланыштуу экени чоң кызыгууну жаратты. Балким буга баланы тарбиялоо же аны багуу системасы таасир тийгизер. Ошондой эле генетика, аялдын кош бойлуу кезиндеги абалынан да көз каранды болушу мүмкүн", — дейт Англиядагы университеттин окумуштуусу Дитер Вольке.
Ал эми жалпы жонунан наристелер бирдей эле ыйлай турганы белгилүү болду. Алгачкы эки жумада бир күндө эки сааттай, 1,5 ай болгондо эки сааттан ашуун, үч айга кеткенде бир сааттын тегерегинде ыйлары аныкталды.
