БИШКЕК, 2-апр. — Sputnik. Эки айга №1 СИЗОго камакка алынган экс-депутат Садыр Жапаровдун колунун кан тамырлары кесилген. Бул тууралуу Sputnik Кыргызстан агенттигине КРдин Жаза аткаруу мамлекеттик кызматынын маалымат кызматынан билдиришти.
Биринчи май сотунун чечими менен аны №1 СИЗОго эки айга камакка алышкан.
Маалыматка караганда, учурда ал ден соолугуна байланыштуу №47 тергөө абагынын ооруканасына которулду.
"Ал ооруканага бүгүн эртең менен түштү. Колунун кан тамыры кесилиптир. Учурда медициналык жардам көрсөтүлдү. Азыр абалы канааттандыраарлык", — деп айтылат билдирүүдө.
"Эртең менен туугандарыбыз жолдошумду Тез жардам менен ооруканага алып кетиптир деп телефон чалышты. Кекиртеги жана колдору кесилгенин айтышты. Азыр туугандардын баары №47 колониянын жанына чогулду. Эки адвокат кирген, ошолорду күтүп атабыз", — деди Асанбаева.
Окуянын чоо-жайы такталууда.
